1Pe 4 | NdeIBE | STEP | Ngakho, njengoba uKhristu wahlupheka emzimbeni wakhe, lani hlomani ngesimo esifanayo, ngoba lowo owahluphekayo emzimbeni wakhe usehlule isono.

1 Peter 4

Ukuphilela uNkulunkulu

1 Ngakho, njengoba uKhristu wahlupheka emzimbeni wakhe, lani hlomani ngesimo esifanayo, ngoba lowo owahluphekayo emzimbeni wakhe usehlule isono. 2 Ngakho-ke, ukuphila kwakhe kwasemhlabeni okuseleyo kakuphileli izinkanuko ezimbi zabantu, kodwa intando kaNkulunkulu. 3 Ngoba selichithe isikhathi esaneleyo ngaphambili lisenza lokho abahedeni abakhetha ukukwenza – impilo yobudlova, inkanuko, lokudakwa, ukuzitika, ukuzivusa amadlabuzane kanye lezithombe eziyisinengiso. 4 Bakubona kumangalisa ukuthi kalibhudlukeli kanye labo kusikhukhula sinye sencithakalo, njalo bayalithuka kakhulu.

5 Kodwa kuzamela baziphendulele kuye olungele ukwahlulela abaphilayo kanye labafileyo. 6 Ngoba lesi yisona sizatho esenza kwatshunyayelwa ivangeli lakulabo khathesi asebefile, ukuze bahlulelwe ngokwabantu mayelana lomzimba, kodwa baphile ngokukaNkulunkulu mayelana lomoya.

7 Ukuphela kwezinto zonke sekusondele. Ngakho kumele liqedisise njalo lizithibe ukuze likhuleke. 8 Phezu kwakho konke, thandanani ngokupheleleyo, ngoba uthando lugqibela izono ezinengi. 9 Yamukelanani emakhaya enu kungekho kukhonona.

10 Lowo lalowo kumele asebenzise loba yisiphi isipho somoya asamukelayo ekusizeni abanye, ewusebenzisa ngobuqotho umusa kaNkulunkulu ngezimo zawo ezahlukeneyo.

11 Uma umuntu ekhuluma, kumele akhulume njengokhuluma amazwi kaNkulunkulu wona ngokwawo. Uma umuntu ekhonza, kumele akhonze ngamandla awaphiwa nguNkulunkulu, ukuze kuthi ezintweni zonke uNkulunkulu adunyiswe ngoJesu Khristu. Udumo lamandla kakube kuye kuze kube nini nini. Ameni.

Ukuhlupheka ngenxa yokuba ngumKhristu

12 Bangane bami abathandekayo, lingamangaliswa yibuhlungu besilingo elibuzwayo, kungathi kwenzakala into engaziwayo kini.

13 Kodwa thokozani ngokuthi liyahlanganyela ekuhluphekeni kukaKhristu, ukuze lithokoze kakhulu lapho inkazimulo yakhe isibonakaliswa.

14 Uma lithukwa ngenxa yebizo likaKhristu, libusisiwe, ngoba uMoya wenkazimulo lokaNkulunkulu uhlezi phezu kwenu. 15 Uma lihlupheka, akungabi njengombulali loba isela kumbe olunye uhlobo lwesigebenga loba lanjengongenelayo ezindabeni zabanikazi.

16 Kodwa-ke, uma lihlupheka njengomKhristu, lingayangeki, kodwa dumisani uNkulunkulu ngokuba lebizo lakhe. 17 Ngoba kuyisikhathi sokuthi ukwahlulela kuqalise ngabendlu kaNkulunkulu; njalo uma kuqalisa ngathi, isiphetho sizakuba yini kulabo abangalaleli ivangeli likaNkulunkulu na? 18 Njalo, “Uma kunzima ukuba abalungileyo basindiswe, pho kuyini okuzakwenzakala kwabayizoni kanye labeyisa uNkulunkulu na?”

19 Ngakho-ke labo abahlupheka ngokwentando kaNkulunulu kumele bazinikele kuMdali wabo othembekileyo njalo baqhubeke besenza okulungileyo.